Astara terminalı

Astara terminalı, İranın Astara şəhərində 35 hektar ərazidə, Azərbaycan-İran sərhədindən 1,4 km aralıqda yerləşir.

Azərbaycan və İran Hökumətlərarası razılaşmaya əsasən 2017-ci ildə Terminalın inşasına start verilib.

Tikintisi “Azərbaycan Dəmir Yolları” QSC tərəfindən aparılan Astara terminalı 25 il müddətinə Azərbaycana icarəyə verilib. Astara terminallar modulunun inşaat işləri davam etməsinə baxmayaraq, artıq terminalın bir neçə modulu hazırdır və 2018-ci ilin əvvəlindən burada yükaşırma əməliyyatları həyata keçirilir.

Astara terminalında yükaşırma əməliyyatları “Azərbaycan Dəmir Yolları” QSC-nin törəmə şirkəti olan “ADY Express” MMC tərəfindən aparılır.

2020-ci ildə Astara terminalında aşırılan yüklərin ümumi həcmi 422 100 ton və ya 8918 vaqon təşkil edib ki, bu da 2019-cu illə müqaisədə 16% çoxdur. Belə ki, 2019-cu ildə Astara terminalında aşırılan yüklərin ümumi həcmi 363 842 ton təşkil edib.

Orta hesabla 2020-ci il ərzində Astara terminalında, gündəlik aşırılan yüklərin həcmi 1384 ton və ya 29 vaqon təşkil edib.

Yüklərin növünə gəldikdə, 2020-ci il ərzində aşırılan yüklərin 37% taxta və taxta materialları, 20% tikinti materiallar (sement, klinker, kafel və s.), 13% meyvə və tərəvəzlər, 11% konteyner, 8% dənli bitkilər (arpa, taxıl, buğda və mərci), 11% isə digər yüklərə aid olub.

Şimal-Cənub Beynəlxalq nəqliyyat dəhlizinin tərkib hissəsi olan Astara yük termilanından keçən yüklərin əksəriyyəti Rusiya və İrana aiddir. 2020-ci ildə buradan keçən yüklərin 75% Azərbaycan ərazisindən nəql edilən tranzit yüklərin payına düşüb.